Жаңы шайланган Жогорку Кеңештин төрагасы баш болгон жетекчилик кызматтарга “альтернативасыз” шайлоо талкуу жаратты. Бул маселе парламенттин өзүндө көтөрүлдү. Жогорку Кеңеш төрагасы “парламенттеги жетекчилик кызматтарга алдын ала пландалып эле коюп жатасыңар” деген сындарды четке какты. Айрым депутаттар комитет төрагаларын жана анын орун басарларын шайлоодо эч кандай чектөө болбогонун, каалоосу барларга талапкерлигин коюуга мүмкүнчүлүк түзүлгөнүн айтууда. Парламенттеги маанайдан улам плюрализм, пикирин ачык айтууга мүмкүн болбой калабы? Парламент көз каранды органга айланабы? деп суроо салгандар болууда.